Jak Ta Meuseudeukah

  • Whatsapp

Oleh : Tgk Samuti 

CA’E  ACEH—

Meunyo galak ta meuseudeukah
Janji bak Allah mudah raseuki
Adak peunyaket han that ji singgah
Umu beureukah keuhendak Rabbi.

Meunyo ureung kriet cit apoh apah
Sabe lam sosah wate ta ue hi
Maken le atra meutamat sosah
Niet meuseudeukah ‘oh geuneuk ili

Wate rab mate lake bak Allah
Umu neutamah wahe ya Rabbi
Lon neuk ibadat wa ash shaddaqah
Tapi le Allah han Geu padoli.

Oleh karna nyan syeara meutuwah
Ci meuseudeukah nak neu eu bukti
Di donya mantong Allah peuleumah
Kon lon beurakah wahe hai akhi

Lam puasa nyoe mari hai sahbah
Ngon mata siblah ngieng kanan kiri
Nyo na syedara tanyoe yang sosah
Jok lah maidah saka ngon kupi

Buka puasa ngon bloe timon wah
Kadang meusiblah gobnyan tan rupi
Meunyo geutanyoe na bacut mudah
Hak ureung sosah mari tanyoe bri.

Meumada ‘ohnoe haba lon peugah
Beuneupeumeu’ah nyo salah rawi
Kadang tan beutoi lage lon peugah
Ulon peusilah droe neuh koreksi.

Related posts