Lakoe phui jaroe (bagian ke 2)

  • Whatsapp

Oleh : Tgk Samuti

CA’E ACEH—

Nyang cukop seudeh nibak siuroe
Ka geupoh binoe le Apa Luha
Na salah bacut di ma si Putroe
Dari cot uroe geumaguen hana

Ban geulop sange le teungku lakoe
Geukalon keudroe meusapeu hana
Geumeuseurapa han jeut ta deungo
Lage ka pungo di Apa Luha

Hana geutupeu gobnyan salah droe
Geupeupok leumo sampoe ‘an sinja
Meu ungkot masen pih hana geubloe
Peu peubeungeh droe keu ma si dara

Di Apa Luha meunan tiep uroe
Bah pih salah droe Inong geutampa

Meunyo na aneuk keunan ji peutoe
Ka geuseureuloe ngon taloe tima
Kuat seumeupoh di gobnyan sidroe
Leupah phui jaroe di Apa Luha

Beuthat pih meunan sifeut di lakoe
Po ma si Putroe cukup that saba
Bah pih paleut keunong tiep uroe
Keudeh nibak Po gobnyan meudo’a

Neubri beusadar ayah si Putroe
Bek le ulon nyoe sabe geutampa
Ka han ek lon theun Sabe tiep uroe
Tulong hamba nyoe oh yaa Rabbana

Neubri lakoe lon bek peupok leumo
Bek cit meulaloe bak layang tuha
Bak ie jok masam bek le geupeutoe
Bek le cit laloe bak judi bola

……..bersambung,

Related posts