Lakoe Phui Jaroe

  • Whatsapp

Oleh : Tgk Samuti

CA’E ACEH—

Read More



Salam’alaikom Po bungong panjoe
Aduen ngon adoe keumuen ngon Apa
Jinoe lon beuot ban siploh jaroe
Peumeu’ah lon nyoe wahe syedara

Lon tuleh ca’e kadang meucawo
Maklum ulon nyoe ureung ka tuha
Ok pih ka puteh teulhoh ngon gigoe
Ta pajoh tumpoe tan le di meurasa

Yoh mantong gagah bak saboh uroe
Dumpeu ta tampoe meumacam rupa
Pajoh sie manok tuleung ta eungkhoe
Seubab kha gigoe yoh mantong muda

Meuban ka tuha cit ka lage nyoe
Bandum geutanyoe ta teumei rasa
Hana peu ta grop sinoe lam bumoe
Beuna ta thei droe yoh mantong muda

Yoh mantong tarek beuteh meuasoe
Bek gadoh laloe ngon sipak bola
Bek sampoe mugreb gohlom ta manoe
Asa han meuho mugrep pih hana

Na ladom gadoh bak peupok leumo
Keudeh ngon keunoe leumo geuhila
Nyo han ji meupok cinuek ngon taloe
Seureuloe leumo hana geukira

Na yang ladom wahe teungku droe
Abeh meusaho dalam blang raya
Peu ek seulayang ‘oh seupot uroe
Mantong jok taloe sampoe ‘an sinja

Seumbahyang mugreb hana ji pakoe
Asa han meuho ka u cong kala
Beuingat-ingat wahe e adoe
Bek gadoh laloe piasan
donya

…… bersambung

Related posts