Menghindar dari Corona

  • Whatsapp

Oleh : Tgk Samuti

CA’E ACEH—

Read More



Salam’alaikom wahe e sahbat
Saleum horeumat bandum syedara
Nibak uroe nyoe uroe Jumeu’at
Ka lapan meuhat tanyoe puasa

Beusehat tuboh kheundak Hadharat
Beu ek ibadat pujoe Rabbana
Beujioh bala beugeubri rahmat
Keu bandum sahbat tuha ngon muda

Ta lakei bak Po bak tiep-tiep saat
Tanyoe seulamat dari Corona
Peulom geutanyoe dalam ibadat
Tuhan hadharat neukabol do’a

Geutanyoe keudroe pih sabe beuingat
Sagai bek silap peusan Umara
Nyo woe u Gampong ka geutham siat
Wahe e sahbat bak uroe raya

Beuna ta pateh bandum nasehat
Beuta theun siat saweu syedara
Kon hana sayang kon han teuingat
Nyan saboh syarat hindar corona

Jaga kebersihan pih han jeut silap
Meunan hai sahbat suroh Rabbana
Cit ka jameun kon ka geupeuingat
Keu tanyoe ummat yoh goh corona

Geuyue rhah jaroe oleh Hadharat
Bak tanyoe ummat limong kutika
Ta jaga wudhuk sagai bek silap
Nyan pih keu syarat jioh Corona

Tanyoe bek panik teumakot bek brat
Yang peunteng that2 beule meudo’a
Useuha tanyoe baro manfaat
Meunyoe tamumat nibak Rabbana

Keudeh nibak Po do’a ta panjat
Beujioh laknat mara bahaya
Peulom geutanyoe Teungoh ibadat
Teunte Hadharat geukabol do’a

Meumada ‘ohnoe ca’e lon surat
Meupat yang silap, meu’ah beuraya
Kon lon peurunoe tupe meulompat
Seukedar peuingat wahe syedara.

Related posts