Ramadhan ka Akhee

  • Whatsapp

Oleh : Tgk Samuti

CA’E ACEH—

Deungon bismillah haba lon peuphon
Assalamu’alaikum lon teugor sapa
Meu’ah syedara meunyo teusinggong
Dalam ca’e lon kadang na gasa

Kadang na haba yang kureung meuphom
Atau syeara lon meukeunong hana
Ladom na galak keu timphan teupong
Kadang yang ladom galak haluwa

Dalam ca’e nyoe lon keuneuk singgong
Ka trok bak ujong tanyoe puasa
Ka siploh akhe wahe rakan lon
Lake bak Rabbon beutrok ban pinta

Ubena dosa beugeupeuampon
Meu ube jarom bek na meusisa
Rahmah maghfirah ka lheuh ta junjong
Itqum minan nar jinoe syedara

Tingkatkan amai maken bak ujong
Meunan le Rabbon geuyue bak hamba
Dalam Al Qur’an cit ka teususon
Buka rakan lon neucuba baca

Pahala puasa keu Allah langsong
Cit sidroe Rabbon balah keu hamba
Mudah2an tanyoe tattaqon
Meunan keuh meuphom wahe syedara

Ji meusu tok tok di cong bak sukon
Ji meusu tiong di cong bak bangka
Jinoe Ramadhan katrok bak ujong
Karap meusambong ngon uroe raya

Kamoe di rantoe cukop that rihon
Neuk woe U gampong saweu syedara
Bak uroe raya dak jeut meukumpoi
Tapi rakan lon takot Corona

Oleh karna nyan adoe aduen lon
Peumeu’ah ulon ubena dosa
Bak uroe raya han trok u gampong
Ta peulheuh rihon lewat media

Rot layeu hp rindu ta sambong
Smoga laen thon meureumpok teuma
Bak uroe raya ukeu tanyoe meukumpoi
Sinan di gampong bandum syedara

Meumada ‘ohnoe haba lon suson
Meu’ah keu ulon wahe syedara
Kadang hana paih uram ngon ujong
Pakhok han beutoi han meuho makna.

Related posts