Sambot Puasa

  • Whatsapp

Oleh : Tgk Samuti

CA’E ACEH—-

Salam’alaikom rakan meutuwah
Jaroe dua blah ateuh jeumala
Na saboh haba ulon neuk peugah
Keu buleun Rahmah buleun puasa

Buleun Ramadhan jinoe ka leumah
Geuyue le Allah tanyoe puasa
Keu kawom dilei na cit peurintah
Nibak Po tollah geuyue puasa

Nibak buleun nyoe rakan meutuwah
Peu le ibadah wahe syedara
Yang sunat mantong wajeb geubalah
Meunan le Allah geujok keu hamba

Meunyo yang wajeb cit han peu peugah
Balasan Allah meulipat ganda
Han mungken sulet janji Potollah
Hana bak Allah sifeut duseuta

Bagi yang mampu ta meuseudeukah
Meunan le Allah geuyue bak hamba
Beutatem tolong ureung yang sosah
Atra meutamah kheundak Rabbana

Beutapeuteubiet zakeut ngon fitrah
Infak,sedeukah pih tanyoe beuna
Ban geuteurimong le ureung sosah
Keu tanyoe bagah gobnyan meudo’a

Seugala pujoe meuwoe keu Allah
Yang meuseudeukah neutamah atra
Beusehat tuboh beu ek ibadah
Neubri ya Allah beuampon desya

Meunan keuh do’a bak ureung sosah
Teuma le Allah geu kabol sigra
Do’a ureung nyan hijab geu peuhah
Yang meuseudeukah meutamah kaya

Meunan hai teungku bacut lon peugah
Kon keubeurakah ulon ceurita
Tapi nyo beutoi lage lon peugah
Pubuet beubagah wahe syedara

‘Ohnoe keuh mantong haba lon surah
Meunyo cit salah meu’ah beuraya
Peulom buleun nyoe cit buleun Rahmah
Bek sia payah tanyoe puasa.[]

Related posts