Rahasia Tanggai “26”

  • Whatsapp

Oleh : Tgk Samuti

CA’E ACEH—

Salam’alaikom wahe e rakan
Inong ngon agam tuha ngon muda
Yang na di gampong atau di peukan
Nibak lontuan hana meubeda

Lon lake meu’ah bak bandum rakan
Bak lon keumarang kadang na cupa
Kadang na beungeh yg ladom rakan
Seubab na kadang meugeunyie haba

Lon tuleh ca’e bahpih meujan-jan
Kadang hai rakan han meuho punca
Dalam ca’e nyoe lon keuneuk peutrang
Tanggai Dua Nam dalam rahsia

Peu na teupike droe neuh hai rakan
Nibak tanggai nyan kayem na bala
Bak Dua Ribe Peut tanggai Dua Nam
Ka kheundak Tuhan ji teuka geumpa

Hana padum trep teuma ‘oh lheuh nyan
Wahe e rakan tsunami teuka
Cukop le ureung nibak uroe nyan
Geuwoe bak Tuhan ngon siklep mata

Meureutoh ribe ureung meuninggai
Meunyo ta keunang seudeh teuh raya
Mari geutanyoe lake bak Tuhan
Bala lage nyan bek le meugisa

Meunyo na ureung yang mantong tungang
Nyan keuh ureung nyan tukang hei bala
Kadang ka tuwo jinoe di gob nyan
Peuingat rijang wahe syedara

Dua Ribe Nam tanggai Dua Nam
Teukeudi Tuhan geumpa di Yogja
Ka abeh anco dum na bangunan
Seudeh hana ban ta kalon rupa

Yang anco rumoh hana pat tinggai
Meungungsi yoh nyan nibak syedara
Rame that ureung kirem bantuan
Kirem makanan,baje ngon ija

Dua Ribe Sikureung tanggai Dua Nam
Geumpa wate nyan Tasik Malaya
Rumoh dum anco duson ngon peukan
Inong ngon agam abeh binasa

…….. Bersambung

Related posts