Tukang P’iep Darah (bagian ke 3)

  • Whatsapp

Oleh : Tgk Samuti

CA’E ACEH—

Read More



Hana peu ta grop lam bumoe Allah
Nyo tan ibadah han sakon guna
Bah pih seumbahyang ta teukui tangah
Nyo peurangui lintah akhe binasa

Peusaho atra haleue ngon tahyibah
Meunan le Allah geuyue bak hamba
Ban na raseuki ta meuseureukah
Geubri le Allah jioh ngon bala

Ji oh peunyaket hate han sosah
Meunan geupeugah dalam agama
Adak pih saket puleh ngon reumpah
Han payah langkah U Malaysia

Le that ta kalon pemimpin yg paih
Han apoh apah ‘oh wate tuha
Wate pension gobnyan han sosah
Seubab meulangkah bak jalan beuna

Seubab yang hak gob han geupeusiblah
Han tom meusalah bak geukeureuja
Gobnyan keureuja kareuna Allah
Ngon hate ikhlas geupimpin bangsa

Wahe pemimpin ingat beuleumpah
Amanah Allah bek gata tuka
Beuna ta ingat yoh ta meusumpah
Ngon demi Allah ta kheun le gata

Meuji jok mantong teurimong salah
Peulom yang tan sah lake le gata
Cit meunan ta kheun wate meusumpah
Wate mahkamah ji lantik gata

Gata bek tuwo lheuh ta meusumpah
Siksaan Allah peudeh lageina
Raya that dasya peumeu’en sumpah
Ingat beubagah wahe syedara

Meumada ‘ohnoe ca’e lon surah
Lon lake meu’ah bak rakan dum na
Kadang di droe neuh lage lon peugah
Laju neu ubah bek neupreh losa

Bandum geutanyoe teunte na salah
Amponan Allah laju ta pinta
‘Oh lheuh seumbahyang jaroe ta tadah
Bak buet yang salah bek le ta gisa.

TAMMAT.

Related posts